– Бұл кереметті жасаған кім екен? – деп жатырмыз таңғалып.
– Қазынагүл деген апамыз бар, бұл сәукеле сол кісінің қолынан шыққан керемет, – деді орталық директоры Нұрсұлу Еркебайқызы.
Нұрсұлудың айтуынша, Қазынагүл Қылышбайқызы Қоянды ауылдық клубының мәдениет қызметкері. Ауылдағы «Кәусар» әжелер ансамблін басқарады. Осы ансамбльдің мүшелері Нәсипа Алтаева, Шолпан Тежекова, Гүлбағиран Қайырбай, Нәсіп Малыбай, Сұлушаш Құрманова 10 жылға жуық уақыттан бері ән салып, ою-өрнек ойып, жұртшылықты қолөнерлерімен қызықтырып келеді. Былтыр кәусарлықтардың ұйымдастыруымен «Алтын оймақ» қолөнер көрмесі ұйымдастырылыпты. Көрменің мақсаты – халқымыздың ұлттық нақыштағы бұйымдарын заманға сай жаңа үлгіде көрсету. Осы орталықтағы көрмеде апа-әжелер жасаған қолөнер бұйымдары жинақталыпты. Тіпті әжелер әртүрлі кимешектер үлгісін жасап, «Кимешектер шеруін» де өткізіпті.
Мысалы, Гүлбағиран апай көрпеше, жастықшаларды жасап, тоқыма тоқиды, Қазынагүл апай фетрдан ою құрайды, осы матадан қыздарға арналған ұлттық нақыштағы заманауи қол сөмкелерін, қамзол, бас киім тігеді. Ал көрмеге қойылған осы бұйымдардың ішінде ерекше көзге түсетіні қазақ қыздарының сұлулығын паш ететін бас киімдерінің бірі – сәукеле.
Қазынагүлдің сәукелені биік, көзге түсерліктей етіп жарқыратып, әшекейлеп жасаудағы мақсаты қыздарға өзге жұрттың емес, өзіміздің ұлттық бас киімді киіп ұзатылу керектігін еске салу еді. Сәукелені ұзатылған қыздар және оның жанына еріп жүретін құрбылары да киген. Негізгі бөліктері – тәж, төбе, құлақбау және артқы бойы. Маңдай тұсына жібек шашақ тағады. Қыздарымызға сәукеленің ұлтымыздың мәдениеті мен өнерінің озық үлгісі, өнер туындысы ретінде бағаланатын қастерлі дүние екенін ұқтыруды ойлаған. Қазынагүл сәукелені 3 ай бойы тігіп, жасап шығыпты.
– Жалпы, «Атамұра» орталығы 1993 жылы 16 желтоқсанда ашылды. Мақсаты – ұмытылып бара жатқан салт-дәстүрлер, тарих пен мәдениет, тілімізді, ұлттық өнерімізді насихаттау. Мысалы, «Ғасырлар сарыны», «Жігіт сұлтаны», «Қазақтың келіндері-ай», «Киелі кимешек», «Әужар», «Тұсаукесер», «Селт еткізер», «Ауылдағы той» рухани-мәдени шараларын өткіздік. Орталықта «Ақсақалдар әділ-қазылығы» қоғамдық бірлестігі, «Жұлдыз» вокалдық үйірмесі, «Жас толқын» ақындар мектебі, «Шабыт» әдеби бірлестігі, «Қыран», «Гүлзар», «Атамұра» фольклорлық-этнографиялық ұлт-аспаптар ансамблі бар. Орталыққа қаланың 16 ауылдық клубы қарайды. Барлық клубтарда көркемөнерпаздар ұжымдары жұмыс істейді. Орталықта, жазушы Роллан Сейсенбаев, «Шал» фильмінде басты рөлді сомдаған Ерболат Тоғұзақов болды. Үндістан мен Франция елшілерін де қарсы алдық, – дейді Нұрсұлу Төлеубаева.
Сонымен бірге орталықта Қуат Әбусейітов, Қалмұқан Исабай, Фариза Оңғарсынова, Роза Бағланова, Ермек Серкебаев секілді белгілі тұлғалар болыпты.
Фарида БЫҚАЙ,
«Егемен Қазақстан»
Павлодар облысы,
Екібастұз қаласы
Суретті түсірген Пана ЫДЫРЫСОВА
