Педагогика институтын бітірген қостанайлық жастар әрі қарай жоғары білімін магистратура, докторантура дәрежесінде жалғастыру үшін олар Алматыдағы екі жоғары оқу орнына немесе іргедегі Ресейдің педагогика университеттеріне баруы керек болатын. Институттан кейін отбасын құрып, мектептерде қызмет істейтін мұғалімдерге магистратурада оқу қиындық туғызатын.
Жоғары оқу орнының жаңа мәртебесі бізге магистратура мен докторантуралық оқу бағдарламаларын ашуға заңды мүмкіндік берді. Біз психология және педагогика мамандығы бойынша магистратура лицензиясын алып та үлгердік. Алдағы жылдары түлектер 12-13 мамандық бойынша магистратура оқу бағдарламасын сырттан іздемей, өзімізде оқитын болады, дейді университет ректоры Еркін Әбіл. Сонымен қатар білім ордасында бір-екі мамандық бойынша докторантура оқу бағдарламасын ашуға дайындық жұмыстары жүргізілуде.
Жаңа педагогикалық университетте студенттердің алаңсыз білім алуы үшін әлеуметтік қолайлы жағдай да жасалады. Елбасының «Президенттің бес әлеуметтік бастамасы» Үндеуінен бастау алатын жұмыстар қазірдің өзінде қолға алынды. Биыл 86 орындық бір жатақхананың құрылысы бас талады. Төрт жылда университетте барлығы 444 орындық жатақхана кешені бой түзейтін болады. Университет ректорының айтуынша, алдағы жылдары білім ордасы студенттерді жатақханамен толық қамтиды.
Қостанай мемлекеттік педагогикалық университеті институт болып тұрғанда да оған жастар тек Қостанай төңірегінен ғана емес, Қазақстанның солтүстік облыстарынан да келіп оқитын. Қазір «Серпін» бағдарламасы бойынша Қазақстанның оңтүстік облыстарынан, бір семестрге Қытайдан келіп оқып жатқан жастар бар. Жатақхана мәселесі шешімін тапқан уақытта университет ұжымы Қырғызстаннан, Өзбекстаннан, Түрікменстаннан, көрші Ресейден де талапкерлер тартуды, оларға арнап қосымша бағдарлама жасауды да ойластырып отыр.
Нәзира ЖӘРІМБЕТ,
«Егемен Қазақстан»
ҚОСТАНАЙ
