«Бүгінде Покровка ауылы маңындағы судың деңгейі 1108 сантиметрді құрап отыр. Тасқынның беті қайтқанымен, қауіп сейілер емес. Долматово елді мекенінде судың деңгейі 1250-1300 сантиметргедейін жетеді деп күтілуде. Новоникольское ауылына қатынайтын көпірді су басып, тұрғындар айналма жол арқылы қатынауға мәжбүр. Су барысын бақылау үшін 6 бекет құрылды. Оларға 200-ден астам маман тартылған», дейді «Қазгидромет» РМК СҚОФ-ның директоры Қымбат Мерғалимова.
Облыстық төтенше жағдайлар департаменті басшысының орынбасары Ерік Сарыбаевтың айтуына қарағанда жедел топтар сақтық шараларын күшейтіп, кез келген қиындықтарды еңсеруге әзір. Петропавл торабындағы су деңгейі 960 сантиметрге дейін көтерілген. Алдағы күндері , бұл көрсеткіш 1060 сантиметрге дейін жоғарылайды деген болжам бар. Әсіресе шеткері аумақтардағы саяжайларды қызыл су басу қаупі басым. Оның зардабын жылдағыдай Зеречный кентінің тұрғындары да көбірек тартады. Осы жердегі тасжолдың бір бөлігін қызыл су шайып кеткен.
Қала сыртында тұрып жатқан адамдар қауіпсіз жерлерге көшірілетін болады.
Өмір Есқали,
«Егемен Қазақстан»
Солтүстік Қазақстан облысы