Өзінің баяндамасында ведомство басшысы энергетика саласында атқарылған жұмыстар, жетістіктер және болашақ жоспарлар, сонымен қатар өткен жылда іске асырылған жұмыстардың нәтижесіне тоқталды. Мұнай-газ саласының барлық секторындағы көрсеткіштер 2017 жылдың сәйкес кезеңімен салыстырғанда өсімді көрсететінін көлденең тартты.
«Жер қойнауы туралы кодекске сәйкес жер қойнауын пайдалану құқығын беру айтарлықтай жеңілдетілді, мерзімдер қысқартылды, әкімшілік кедергілер төмендетілді, келісімшарт 40 жұмыс күніне дейін, құқықтық, экономикалық сараптамалар, келісімшартқа қол қою үшін жобалық құжат қысқартылды. Осы жылы жер қойнауын пайдалану құқығына конкурстар жалғастырылатын болады, бірінші 5 өңірде (Қостанай, Қарағанды, Қызылорда, Жамбыл, Маңғыстау облыстарында) 11 жер қойнауы учаскелері ұсынылды.
Конкурстың нәтижелері бойынша келісімшарттарға Жаңа кодекстің нормалары бойынша қол қойылады. Айта кететін тағы бір жайт, 2018 жылы Шымкент зауытындағы жаңғырту жұмыстары аяқталады. 2018 жылы мұнай өңдеудің жалпы көлемі 1 млн тоннаға өсіп, 16 млн тоннаны құрайды. Сонымен қатар 2018 жылдың басынан бастап, Кеден одағының Техникалық регламенті күшіне енді. 2018 жылдың шілдесінен бастап мотор отындарының сапасы K-4 және 5 экологиялық кластарына сәйкес келуі тиіс», деді Қанат Бозымбаев.
Сонымен қатар министр электр энергиясын өндіру көлемі 46,4 млрд кВт. сағатты құрап, бұл 2017 жылдың сәйкес кезеңіне қарағанда 7,7 пайызға өскенін тілге тиек етті және Энергия өндіруші компаниялардың шекті тарифтерін қайта қарау бойынша жұмыстар жүргізіп жатқанын айтты.
Рауан ҚАЙДАР,
«Егемен Қазақстан»
