Түркістанның тарих тегершігінде жаңа бір белеске, дәлірек айтсақ өз арнасына қайта оралуы, қайтадан ұлтты ұйыстыратын аймаққа айналғаны, облыстық дәрежеге көтеріліп, келешекте түркі әлемінің, тіпті шығыс халықтарының мәдениеті мен өнерінің қайтадан өркен жайып, қайнар бұлағына айналатыны мәртебесі биік болған өлкенің қуаты мен әлеуетінің қаншалықты мол екенін танытып отыр.
Түркістаннан халқымыз Әзірет Сұлтан деп құрмет тұтатын Қожа Ахмет Ясауиге мавзолей орнатып, ата-бабамыздың мәдени ағынын бір арнаға түсіріп, келешектегі қазақтың Алтын қазығы етіп белгілеуін біз бүгінгі тәуелсіздігіміздің сенімді діңі деп бағалаймыз. Қожа Ахмет Ясауи – өзіне дейінгі дамып келген мыңжылдықтар мәдениетін бір бойына жиып, келер ұрпаққа мәдениет пен өнердің сан салалы бастау тұмаларын ашып кеткен біртуар тұлға. Ол тұмалар – қазақтың таусылмас қасиетті ділі.
Елбасының Астананы еліміздің жүрегі, мемлекетіміздің тірегі етіп қалыптастырудағы әрбір қадамы Қазақстанның баянды болашағының кепіліне айналды.
Бұл орайда елордамыз Астананың 20 жылдық мерейтойында Түркістанның жаңа облыстық ордаға айналуы – тарихта алтын әріптермен жазылатын ерекше тарихи шешім болды!
Түркістан облысын құру бойынша қабылдаған Елбасының Жарлығы санамызға серпіліс беріп, өзіміздің рухани әлемімізде үнсіз жәдігерге айналып бара жатқан тарихи-мәдени мұраларымыз бен өнеріміздің кәусарымен суа-
рып, ділімізді оятты. «Рухани жаңғыру» бағдарламасының тағы бір тамаша табысы – Түркістанның облыс орталығына айналуы болды.
Қай қазақтан сұрасаңыз да, оның ата-бабасы, міндетті түрде, Қожа Ахмет Ясауидің мазарына барып тәу еткен, білім алған, сол рухани кәусардан қанып су ішкен қасиетті адам болып шығады. Бұл ақиқатты ауызша жөн сұрасудың ғана еншісіне беріп қоймай, әр қазақ үшін Түркістан қасиетті болатын қайта жаңғырған тарих ақпаратына айналуы тиіс. Түркістанға бармаған қазақтың болашақта да болмайтынын көздеп, мәдениеттің қалыптасқан ордасынан бата алуын тамаша туристік жолмен ұйымдастыруымыз керек.
Ендігі біздің міндет – «Тұма көрсең, көзін аш» деп, ата-бабамыз қағида етіп кеткен рухани бұлақтардың көзін ашу.
Қазақстанның әрбір аймағы, әрбір жер-суы, тіпті топырағының әрбір қиыршығы – тарихта Жер бетіне өркениеттің сәулесін таратқан адамдардың басып өткен іздерін «таңбалап» қалған, әрқайсысы маңдайға тигізіп тәу етерлік қасиетті жәдігер. Түркістанның, осынау сакралды, қастерлі де қасиетті аймақтың өз алдына мемлекеттік деңгейде үлкен дәреже алуы – қазақтың ғана емес, иісі бір түркі жұртының, тіпті көршілес шығыс елдерінің де басын идірген алып тұлғалардың туған жеріне деген ерекше құрметіміз болып табылады.
Сол тұлғалардың ізін тірілту арқылы жаңа ұрпақ қазақ мәдениетінің зайырлылығын, ізгілігін, тарихи сабақтастығын, оның жалпыадамзаттық өркениетпен байланысын, мүмкін, бесігі болғанын дәлелдейтін өздерінің өмірдегі игі жолдарын қалыптастыра алады.
1500 жылдан астам тарихы бар, Қазақ хандығының астанасы болған, шартарапқа кеткен керуен жолдарының тоғысқан жері, Ұлы Жібек жолының орталығына айналған Түркістан қаласы туралы Елбасы Н.Ә.Назарбаев: «Әрбір халық, әрбір тәуелсіз мемлекет өзінің рухани орталығын нақтылап алуы керек. Қазақстанның рухани орталығы Түркістан», – деп баға берген болатын.
Еліміздің рухани өркениетті орталығы болуына бірлесіп атсалысу көптің алдындағы міндет.
Қуатжан УӘЛИЕВ,
Қазақстан Республикасы
Мәдениет және спорт министрлігінің жауапты хатшысы