– Елімізде құрылған алғашқы археологиялық қорық-музейдегі құнды жәдігерлермен алысқа бармай-ақ танысуға мүмкіндік туып отыр, – дейді Атырау облыстық тарихи-өлкетану музейі басшысының орынбасары Сая Ғазимова. – Көрмеде музей қорындағы Х-ХVІІІ ғасырларға тиесілі археологиялық тұрмыстық бұйымдар, нумизматикалық және зергерлік заттар, қару-жарақ түрлері, ХІ ғасырдың аяғы мен ХІІ ғасырдың басында өмір сүрген діндар, ислам дінінің уағыздаушысы, түркі сопыларының бабасы, әйгілі Қожа Ахмет Ясауидің ұстазы һәм тәлімгері Арыстанбаб әулие және оның кесенесі туралы тарихи деректемелер көпшілік назарына ұсынылып жатыр.
Көрменің ашылу салтанатында Отырар мемлекеттік археологиялық қорық музейінің бас қор сақтаушысы Е.Төлендіұлы өңіраралық байланысты нығайтуға бағытталған шараның маңызы жайында айтты. Отырардың мәдени мұралары атыраулықтарға бір ай бойы көрсетіледі.
Бақытгүл БАБАШ,
«Егемен Қазақстан»
АТЫРАУ
