Суретті түсірген Ерлан ОМАР, «Егемен Қазақстан»
12 ақпан – Астанадағы Медициналық әлеуметтік оңалту орталығы жаңа ғимаратқа көшті.
8 наурыз – әлемге әйгілі «McDonald’s» мейрамхана желісі Астана қаласында да ашылды.
5 сәуір – Астана әкімі Ә.Жақсыбеков Сочи қаласының мэрі Анатолий Пахомовпен кездесті. Қос шаһар өзара ынтымақтастық орнату туралы келісімге келді.
11 сәуір – Челябі облысының Астанадағы күндері басталды.
25 сәуір – елорда әкімі қала полициясына қызметі үшін елімізде құрастырылған «Peugeot 301» маркалы 35 автокөліктің кілтін тапсырды.
27 сәуір – Елбасы Н.Назарбаевтың төрағалығымен Астана қаласының экономикалық дамуы және ЭКСПО көрмесін өткізуге арналған кеңес өтіп, Елбасы осы салаға қатысты құрылым басшыларына тапсырмалар берді.
19 мамыр – Астанада бокстан әйелдер арасында әлем чемпионаты өтті. Қазақстандық қыздар байрақты бәсекеден 4 алтын, 2 қола медаль олжалап, командалық есепте бірінші орынды иеленді.
17 маусым – қала әкімі Ә.Жақсыбеков мектеп бітірген 132 түлекке «Алтын белгі» төсбелгісін тапсырды.
1 шілде – Астанада санитарлық-гигиеналық және тұрмысқа қажетті қағаз өнімдерін өндіретін зауыт іске қосылды.
4 шілде – Астананың миллионыншы тұрғыны дүние есігін ашты. Ақжолтай хабарды естіген Елбасы нәрестенің ата-анасын құттықтады. Қала басшысы Ә.Исекешев ерлі-зайыптыларға Елбасы атынан пәтер кілтін тапсырды.
6 шілде – қала күніне арналған «Бағаналы ордам – басты ордам» атты республикалық айтыс өтіп, бас жүлде Еркебұлан Қайназарға бұйырды.
6 шілде – елордада ерекше спорт нысаны – Астана-Триатлон паркі ашылды.
12 шілде – қала тұрғындары Мәскеу-Астана-Бейжің бағытында «Жібек жолы – 2016» ралли-марафонына қатысушыларды «Бәйтерек» монументі түбінде қошаметпен қарсы алды.
24 тамыз – Астана әкімі Рио-де-Жанейро Олимпиадасында медаль алған елордалық спортшылар Данияр Елеусінов, Василий Левит, Гюзель Манюроваға темір тұлпардың кілтін тапсырды.
31 тамыз –Астана қаласында Орталық Азия бойынша баламасы жоқ оқу ордасы – Қазақ ұлттық хореография академиясы ашылды.
15 қыркүйек – Астана әуежайында елорда арқылы жүк тасымалдау инфрақұрылымын дамыту мақсатында жүктер мен тауарларды кедендік рәсімдеуге арналған кеден бекетінің жаңа ғимараты пайдалануға берілді.
19 қыркүйек – Мәскеуде Астана күндері басталды. Екі күндік салтанатты шараға еліміздің абыройын асырып жүрген өнер саңлақтары қатысты.
8 қазан – Астана қаласының «Жасыл белдеу» аумағының оңтүстік-батыс бөлігінде ұзындығы 23 шақырымдық веложол ашылды.
14 қазан – Президент Н.Назарбаев қала әкімі Әсет Исекешевті қабылдап, елорданың тоғыз айдағы әлеуметтік-экономикалық даму қорытындыларын, Тәуелсіздіктің 25 жылдығын мерекелеуге және ЭКСПО-2017 көрмесін өткізуге дайындық барысы жайлы сөйлесті.
19 қазан – елорда төрінде Халық Қаһарманы Рақымжан Қошқарбаевтың ескерткіші ашылды.
21 қазан – бас қалада «ForteBank Kulanshi Artspace» өнер галереясы ашылды.
31 қазан – ЭКСПО-2017 көрмесіне қатысатын мемлекеттердің алғашқы бестігі – Венгрия, Германия, Қытай, Түркия, Франция павильондарына сертификат тапсырылды.
6 желтоқсан – Астанада Н.Назарбаевтың қатысуымен жалпыұлттық телекөпір өтіп, шара үстінде Елбасы елордадағы құрылыс материалдарын шығаратын зауытты іске қосты.
12 желтоқсан – Астана әкімі Әсет Исекешев елордадағы Орталық жедел медициналық стансасының жаңа ғимаратын салтанатты жағдайда ашты.
16 желтоқсан – Мемлекет басшысы Н.Назарбаев ЭКСПО-2017 көрмесi аумағында орнатылған «Тәуелсіздіктің 25 жылдығы» монументін ашты. Нысанның 25 қыры ел тәуелсіздігінің 25 жылдық датасына орайластырылған екен.
Дайындаған
Бекен ҚАЙРАТҰЛЫ,
«Егемен Қазақстан»
