Осы орайда 1 тамыз 30 қыркүйек аралығында «Жаңа Ғасыр» №175 гимназия қабырғасында «Менің таңдауым – балаларға көмек көрсету!» шарасы өтуде. Жоспарланған іс-шаралардың уақытында өткізілуін қамтамасыз етуге байланысты іс-шаралар жоспары бекітіліп, ұжым басшысы мен ұстаздары белсенді атсалысуда. Қазіргі кезде «Бірінші сыныпқа бірінші рет», «Бірінші сынып оқушыларына сыйлық» және тағы басқа шаралар қолға алынған.
Әлеуметтік қорғалмаған отбасы балаларына «Angelher» тігін компаниясының мектеп формасы, «Имран» тігін компаниясы спорттық киімдерін тегін алуға мүмкіндік қарастырылған. Әуезов аудандық білім бөлімі де бірінші сыныпқа келетін 20 оқушыға мектепке қажетті құралдар, сөмкелер, орта буын оқушыларына мектеп формаларын таратты.
Әлеуметтік педагог Сымбат Бірімқұлованың айтуынша, оқу жылының алғашқы айында «Жақсылық жасай білейік», «Біз талапты балдырған – үлгі аламыз жақсыдан», «Риясыз жақсылық» тақырыбында оқушылармен түрлі пікір-таластар, сынып сағаттары, дөңгелек үстелдер өткізу жоспарлануда. Бүгінгі күні сонымен қатар, гимназияның оқу-тәрбие ісі орынбасарларының жетекшілігімен «Таугүл-3» ықшамауданы аумағындағы компьютерлік клубтарда, ойын-сауық орталықтарында кәмелеттік жасқа толмаған жасөспірімдердің кешкі сағат 20:00-ден кейінгі уақытта бей-берекет, қараусыз жүрмеуін алдын алу мақсатында кешкі тексеру шаралары жүргізілуде.
Эльвира Серікқызы,
«Егемен Қазақстан»
АЛМАТЫ
