Жаңа оқу жылы қарсанында «Мектепке жол» республикалық акциясы басталып кетті. Биыл осы әлеуметтік бастамадан «Батыс» өңірлік қолбасшылығының әскери қызметшілері де тыс қалмай, 50-ге жуық оқушыны мектепке әзірледі. Алайда, акцияның қыркүйек айының аяғына дейін созылуына байланысты оқушылардың саны әлі көбеюі мүмкін.
Аталмыш қайырымдылық көмек әскери қызметшілердің отбасыларымен жұмысты ұйымдастыру қызметімен, көпбалалы және белгілі бір себептермен тағдыр қыспағына түскен отбасыларға көрсетілді. Әскери қызметшілер оқушыларды мектепке қажет құралдармен, киім-кешектер мен канцеляриялық тауарлармен қамтамасыз етті.
Әскери қызметшілердің отбасыларымен жұмысты ұйымдастыру қызметінің бастығы Эльвира Ақынбаеваның айтуынша, бастаманың басты мақсаты – көпбалалы, толық емес, ата-анасының қарауынсыз қалған отбасыларды ұмытпай, оларға көмек көрсету. Осы акцияның арқасында, тағы да онға жуық отбасыға қолдау көрсетеміз деген жоспарларын бар екенің айтып кетті.
«Батыс» өңірлік қолбасшылы түрлі акциялар мен әлеуметтік бағдарламаларға ұдайы қолдау көрсетіп отырады, «Мектепке жол» акциясы болса кең көлемде биыл төртінші мәрте өткізілуде. Биыл барлық көпбалалы әскери қызметшілердің отбасыларына толықтай көмек көрсетілді.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
