Аталған іс-шараға Шыңғыс Айтматовтың ұлы, «Ыстықкөл» форумының президенті Асқар Айтматов, Назарбаев Университеттің президенті Шигео Катсу, Қырғыз ұлттық академиясы Ш.Айтматов атындағы Тіл және әдебиет институтының директоры, академик Абдылдажан Ақматалиев, Түркияның Ардахан университетінің профессоры, ғалым Орхан Сойлемез, белгілі режиссер, халық әртісі Талғат Теменов және өзге де қаламгерлер, ғалымдар, жоғары оқу орындарының оқытушы-профессорлары және мектеп басшылары, мұғалімдер мен студенттер қатысты.
Әдеби кештің алғашқы сөзін Шигео Катсу мырза бастап, келген қонақтарға алғыс айтты. Ол Айтматов шығармаларын университет жастарының сүйіп оқитынын жеткізсе, Талғат Теменов Шыңғыс шығармаларының құндылығына тоқталды. Режиссер «Мен адамзаттың Айтматовының біраз шығармаларына режиссерлік еткенім үшін де өзімді бақытты санаймын» деген ақжарма тілегін айтты.
Кеш барысында Қалибек Қуанышбаев атындағы қазақ театрының жас әртістері мен Назарбаев Университеттің студенттері Шыңғыс Айтматовтың шығармаларынан сахналанған көріністер қойды. «Ана – Жер Ана», «Шынарым менің, шырайлым менің», «Жәмила» шығармаларынан көрсетілген үзінділер өте әсерлі шықты. Сонымен бірге студенттер қаламгер туындыларынан ағылшын тілінде үзінділер оқып, келген қонақтарға тамаша көңіл күй сыйлады.
Осындай әсерлі сәттерден соң Асқар Шыңғысұлына сөз берілді. Әңгімесін алғыс айтудан бастаған А.Айтматов қазақ халқының әкесіне деген ықыласы мен құрметінің ерекше екенін тілге тиек етті. «Мен үшін бүгінгі кездесудің орны бөлек, Шыңғыс шығармалары қай уақыттың да жастарының жан дүниесіне өз әсерін қалдырары сөзсіз. Бүгінгі кеш те соның бір айғағындай» деді.
Сонымен бірге Орхан Сойлемез, Абдылдажан Ақматалиев, Назарбаев Университеттің профессоры, Рухани жаңғыру мәдени орталығының директоры Гүлтас Сайынқызы қаламгердің адам жанының айнасындай айрықша шығармалары жайлы ойларымен бөлісті.
Ұларбек НҰРҒАЛЫМҰЛЫ,
«Егемен Қазақстан»