Сенаттың жалпы отырысында «Стандарттау туралы» және оған ілеспе кейбір заңнамалық актілерге өлшем бірлігін қамтамасыз ету және стандарттау мәселелері бойынша өзгерістер мен толықтырулар енгізу туралы заң жобалары бірінші оқылымда қаралды. Бұлар туралы баяндаманы Инвестициялар және даму министрі Жеңіс Қасымбек жасады. Оның айтуынша, «Стандарттау туралы» заң жобасында техникалық регламенттер жүйесін шектеу, стандарттаудың ұлттық жүйесін қалыптастыру және ұлттық органын анықтау және техникалық комитеттердің рөлін арттыру қарастырылған. «Заң жобасы негізінен метрологиядағы өлшем бірлігін қамтамасыз етудің жаңа мемлекеттік құрылымын жасауды және түзетулердің жаңа эталондар калибровкасына өтуін көздейді. Бұл халықаралық саудада өлшемдер нәтижесіне деген сенімді арттыратын негізгі тетіктер», деді Ж.Қасымбек.
Заң жобасы Әкімшілік құқық бұзушылық кодексіне өзгерістер енгізіп, техникалық реттеу мен метрология саласындағы бұзушылықтардың жауапкершілігін арттыруды көздеп, айыппұлдарды үш есе көбейтуді енгізген. Ал «Жол жүру тәртібі туралы» Заңға енгізген толықтыруда – көлік құралдарына электронды паспорт енгізу нормасы қарастырылған.
Негізгі баяндамашыға бірнеше сұрақтар берілген соң заң жобасы талқыланып, онда «қабылдансын» деген бір ғана ұсыныс түсті. «Стандарттау туралы» заң жобасына Сенат бір өзгеріс енгізген екен, ол қабылданып, Мәжілістің қарауына жіберілді. Ал ілеспе заң жобасы бірінші оқылымда өзгеріссіз мақұлданды. Алайда Экономикалық саясат, инновациялық даму және кәсіпкерлік комитетінің төрағасы Асқар Бейсенбаевтың ұсынысымен заң жобасы осы отырыстан кейінгі шағын үзілістен соң екінші рет қаралып, заң қабылданды.
Жалпы отырыста Сенаттың Конституциялық заңнама, сот жүйесі және құқық қорғау органдары комитеті депутаттарының жол жүру қауіпсіздігі мәселелері бойынша депутаттық сауалына жауап беру де күн тәртібіне шығарылған екен. Өйткені сауал жолдаған депутаттар өздеріне жалтарма жауаптар келетініне наразылық білдірген. Бұл туралы депутат Дулат Құсдәулетов айтып берді. Сенаторлар
6 қыркүйекте депутаттық сауал жолдап, жол жүру қауіпсіздігінің бұзылуынан болған апатқа 2017 жылы 24 мыңнан астам адам ұшырап, оның 2 мыңы қаза тапқаны сияқты статистикалық мәліметтер келтіріп, осының себебін анықтау мақсатында сауал жолдаса, қанағаттанарлық жауап болмаған. Сондықтан жалпы отырысқа Ішкі істер министрінің орынбасары Ерлан Тұрғымбаев шақырылып, депутаттардың сауалына тікелей жауап беруін сенаторлар талап еткен көрінеді.
Генерал Е.Тұрғымбаев депутаттарға жол жүру қауіпсіздігіне байланысты бүгінгі таңда жүргізіліп жатқан жұмыстар туралы кеңінен баяндап берді. Жол қауіпсіздігін сақтауға байланысты көптеген жаңалықтар да айтылды. Баяндамадан соң сенаторлар генерал Е.Тұрғымбаевқа және отырысқа қатысып отырған осы мәселеге байланысты басқа да органдардың басшыларына көптеген сұрақтар берді. Сенат Төрағасы Қасым-Жомарт Тоқаев: «Бұл мәселе үнемі Сенаттың бақылауында болады», деп қорытты.
Осы күнгі отырыста сенаторлар Еуразиялық экономикалық қоғамдастыққа мүше бір мемлекеттің азаматтары осы қоғамдастыққа мүше екінші мемлекеттің аумағында еңбек етіп жүрген кезінде ұшырап қалған жазатайым оқиғаларды тергеп-тексеру туралы және Қазақстан мен Иордан Хашимит Корольдігінің арасында Азаматтық қорғаныс, төтенше жағдайлардың алдын алу және оларды жою саласындағы ынтымақтастық туралы келісімдерді ратификациялады.
Отырыстың соңынан сенаторлардың орталық мемлекеттік органдарға жолдаған сауалдары жарияланды.
Жақсыбай САМРАТ,
«Егемен Қазақстан»