Аталған мәселе облыстық әкімдікте 2023-2024 оқу жылына техникалық және кәсіптік кадрларды даярлауға арналған мемлекеттік білім беру тапсырысын орналастыру жөніндегі комиссия отырысында да айтылды. Жиында мемлекеттік білім беру тапсырысын қайта қарау, тапсырыс орналастырылатын ұйымдардың тізбесін анықтау мәселесі қаралды. Сонымен бірге мемлекеттік гранттарды білім беру ұйымдарына үйлестіру жөніндегі түйткілдер де тарқатылды.
Өңірде комиссияның хаттамалық шешімімен 70 мамандық бойынша жалпы 15300 орынға мемлекеттік тапсырыс берілген болатын. Бүгінде техникалық және кәсіптік, орта білімнен кейінгі білім беру ұйымдары тарапынан аталған мемлекеттік тапсырыс орындалып отыр. Яғни 15 мыңнан аса жас колледждерде тегін оқып, жұмыссыз қалдырмайтын жұмысшы мамандығын алатын болады. Облыс колледждеріне 2022 жылы 17 мың грант бөлініп, оның 11 110-ы игеріліп, қалған 5 900-і игерілмей кері қайтарылған болатын. Ал биыл республикалық бюджеттен қарастырылған 15 300 грант 43 колледж арқылы толық игерілді. Өткен жылмен салыстырғанда колледж студенттері 4 мыңға көбейді. Мамандық түріне қарай бір студентке бюджеттен бөлінетін жылдық оқу құны 850 мың теңге мен 1 млн теңге аралығында қалыптасып отыр. Биыл гранттарды орналастыруда ашықтық қағидаты қатаң сақталды. Дегенмен жиында Қазығұрт, Түлкібас, Ордабасы, Сауран, Отырар, Төлеби аудандары мен Кентау қаласында мемлекеттік тапсырысты орналастыруда жергілікті әкімдіктер мен колледждер арасындағы байланыстың дұрыс жолға қойылмағаны айтылды.
Өңірде 14-35 жас аралығындағы жастар саны – 654 353 немесе халық санының 30 пайызын құрап отыр. Оларға жан-жақты қолдау көрсету, жастар саясаты саласындағы жұмыстарды жандандыру – уақыт талабы. Бұл орайда жастар саясатын жүргізу, жастарға қолдау көрсету жұмыстары жаңаша форматқа көшіп, жұмыс тәсілі өзгертілген. Облыстық қоғамдық даму басқармасының мәліметінше, биыл NEET санатындағы жастар үлесін азайту мақсатында 12 мемлекеттік бағдарлама аясында 38 757 жасты жұмыспен және оқу гранттарымен қамту жоспарланған. Бүгінге дейін мемлекеттік бағдарламаларға жалпы 31 236 жас тартылған. Биыл 2021-2025 жылдарға арналған кәсіпкерлікті дамыту жөніндегі ұлттық жобасын жүзеге асыру мақсатында 33 252 (46,1 пайыз) жас жұмыспен қамтуға жолданды. Оның ішінде 10 016-сы (47,5 пайыз) тұрақты жұмыс орнымен қамтылды. «Жасыл ел» жастар жасағы бойынша 1 989 өренге жұмыс орны бөлінген, қамтылғаны – 955. «Серпін-2050» мемлекеттік бағдарламасына 3653 грант берілген болатын, соның ішінде қазіргі таңда облыс бойынша аудан, қаладан 864 талапкер жіберілді. Өңірдің «Аграрлық несие корпорациясы» АҚ арқылы жастарға арналған жеңілдетілген 2,5 пайыздық несие беру бойынша биыл 594 жасты қамту жоспарланып отыр, жалпы қаражат көлемі – 2 млрд 970 млн теңге. Облыс көлемінде аудандық, қалалық Жастар ресурстық орталықтарына бекітілген апталық жоспарға сәйкес, 2,5 пайыздық шағын несие бойынша 325 кездесу және ашық есік күні өткізілген. Бүгінге дейін несие бойынша берілген 648 өтінімнің 407-ісі комиссиядан өтіп, оның ішінде 172 жас несие алған.
Айта кетелік, облыс көлемінде мемлекеттік бағдарламалар, соның ішінде «Жастар практикасы» арқылы 3 167, «Қоғамдық жұмысқа» – 5 893, «Әлеуметтік жұмыс орны» негізінде – 1 668, «Алғашқы жұмыс орны» арқылы 1 199 жас жұмыспен қамтылып отыр. Облыс әкімдігі жастар арасындағы жұмыссыздық деңгейін төмендету, оларды жұмысқа орналастыру бағытындағы іс-шаралар жоспарлы түрде жүргізілетінін мәлімдеді.
Түркістан облысы