Вице-министр өткен жылы қабылданған қолданыстағы мемлекеттік қолдау шараларының аралық қорытындысын жария етті. Атап айтқанда, еліміздегі отбасылық туризмді насихаттайтын «Kids go free» бағдарламасы бойынша биылғы 9 айда 1 800 бала тегін ұшып, 800 отбасы ел ішінде демалуға 80 млн теңге қаржысын үнемдеген.
Е.Еркінбаев туризмді дамыту үшін қажетті жаңа іс-шараларды дамыту жөніндегі жоспарларын да ортаға салды. Яғни алдағы уақытта туристік «Кэш бэк» енгізу, әкімдіктерге елді мекендерден тыс жерлерде инфрақұрылым құру бойынша құзыреттер беру, туристік жобаларды жеңілдікпен кредиттеу мерзімдерін 10 жылға дейін ұлғайту, туристік брендті осы жылдың соңына дейін бекіту, ауыл шаруашылығы мақсатындағы жерлерде туризм нысандарын салуға рұқсат беру, гидтердің қызметін цифрландыру және орналастыру орындарын жіктеу жүйесін жетілдіру сияқты бірнеше жобаны іске асыру жоспарда бар екенін жеткізді.
«Туристер санының өсуі турбизнес үшін жақсы табыс көзі болмақ. Жарты жылдың қорытындысы бойынша қонақүйлер 100 млрд теңге көлемінде пайда тапты. Бұл өткен жылмен салыстырғанда 30 млрд-қа артық. Турбизнес дамыса, салық та көп түседі. Жыл соңына дейін туризмнен ел қазынасына 400 млрд теңге салық түседі деп жоспарлап отырмыз», деді вице-министр.
Спикер сыртқы нарықтарда Қазақстанның туристік әлеуетін ілгерілету бойынша жаңа маркетингтік жоспар құрылып жатқанын мәлімдеді. Бұған қоса ұлттық туристік брендті әзірлеу туралы тапсырма берілгенін, бұл мәселе жан-жақты қарастырылып жатқанын жеткізді.
«Бірінші – инфрақұрылым. Туристік орындарда инфрақұрылым мәселесі сын көтермейді. Логистика да толықтай шешілмеген. Екінші – сапалы туристік өнімдердің аздығы. Цифрландыру мәселесі де бар. Үшінші – сапалы мамандарды оқыту. Төртіншісі – маркетинг пен жарнама мүмкіндіктерінің аздығы», деді Е.Еркінбаев.
Оның айтуынша, аталған мәселелерді жүйелі шешу үшін биыл туризмді дамытудың 2023-2029 жылдарға арналған тұжырымдамасы қабылданып, мақсатты көрсеткіштер бекітілді. Оның ішінде 2029 жылға дейін ішкі туристер санын 9 млн-ға, шетелдік туристерді 4 млн-ға жеткізу көзделген. Туризм саласындағы мамандарды 1,6 есе, ал инвестиция көлемін 2 есе өсіруді қамтамасыз ету керек.
Баспасөз жиыны соңында вице-министр еліміздің халықаралық аренада танылуы бойынша жетістіктерін атап өтті. Таяуда Алматы облысындағы Саты ауылы «Үздік туристік ауыл» аталымы аясында халықаралық туристік ұйым нұсқасы бойынша үздік деп танылғанын хабарлады.
