Олар – «Атамекен» ұлттық кәсіпкерлер палатасы мен Бас прокуратура арасындағы кәсіпкерлердің жүйелі мәселелерін анықтап, бірлесе отырып шешу жөніндегі келісім және Қазақстан кәсіпкерлерінің құқықтарын қорғау жөніндегі уәкіл мен Ресей Федерациясы президенті жанындағы кәсіпкерлердің құқықтарын қорғау жөніндегі уәкілдің кәсіпкерлер құқықтарын қорғау мен саладағы ақпаратты бөлісу жөніндегі келісім.
Басқосуды ашып, сөз сөйлеген Қазақстан кәсіпкерлерінің құқықтарын қорғау жөніндегі уәкіл Болат Палымбетов Ресейдің негізгі экономикалық серіктесіміз екенін атап өтті. «Ынтымақтастық қалыптасқан жылдар ішінде 6000-ға жуық бірлескен кәсіпорын ашылды. Ресей бизнес-омбудсмені институтымен бірлесіп, ауқымды жұмыс атқарылды. Мәскеуде, Атырауда кездесулер өтіп, кәсіпкерлердің заңды құқығы мен мүддесін қорғаудағы тәжірибе алмасу тұрақты түрде жүргізіліп келеді», деген ол шекараға жақын аймақтарда екі елдің шағын және орта бизнесін дамытуға барынша мүмкіндік беруге назар аударды.
Жиында «Атамекен» ұлттық кәсіпкерлер палатасы басқарма төрағасы Абылай Мырзахметов қазіргі бизнесте құқықтық салада алаңдататын мәселелерді шешу барысында тәжірибе алмасу қарқынды жүріп жатқанын әңгімеледі. Келісімшарттар мен келіссөздер ЕАЭО аясында ғана емес, қалыптасқан достық байланыс негізінде жүзеге асуда. «Кез келген қауымдастық кәсіпкерлік құқығын қорғау мен мүддені таныту үшін қызмет етеді. Біздің заңнама басқыншылық түрде емес, достық қалыпта болуы керек. Бізде заңнама мен оның қайшылықтарын жақсы білетін институттар жұмыс істейді. Біздің ең басты міндетіміз – келісім жасау күші, бизнес үшін ережелерді өзгерту. Мемлекеттік аппараттың бизнестің қажеттілігіне қарай назар аударуында айтарлықтай нәтижеге қол жеткіздік», деді А.Мырзахметов.
«Атамекен» ҰКП басқарма төрағасы Бас прокуратура мен Мемлекеттік қызмет істері және сыбайлас жемқорлыққа қарсы агенттікпен бірлесіп атқарылған жұмыстарды да атап өтті. «Біздің міндетіміз – шенеунікке кәсіпкерлік қызметке жасалатын кедергі үшін қолданылатын жаза бар екенін көрсету. Сондықтан кез келген заң мен құжатта кәсіпкерлермен келісу маңызды», деді ол.
Ресей Федерациясының президенті жанындағы кәсіпкерлердің құқықтарын қорғау жөніндегі уәкіл Борис Титов «Атамекен» ұлттық кәсіпкерлер палатасының IV съезінде көтерілген мәселелер мен атқарылған жұмыстар осы форумды өткізуге негіз болғанын жеткізді. Оның айтуынша, кәсіпкерлердің заңды мүдделері мен құқықтарын қорғауда Қазақстанның тәжірибесі қызығарлықтай, сондықтан екі елдің ортақ мүддесі мен экономикалық байланысында бұл шараның маңызы зор. Форумның басты мақсаты – өзгелердің қателігін зерттеп, тәжірибе негізінде оңтайлы шешімдер табу.
Асхат РАЙҚҰЛ,
«Егемен Қазақстан»
